“Suriya, Ukrayna və hazırda Qəzzada baş verən “dağıdıcı” böhranlar dünyanın gələcəyi üçün narahatlıq yaradır”.
Hafta.az-ın yazdığına görə, bu sözləri təqaüdə çıxdığı üçün sabah fəaliyyət müddəti başa çatacaq Türkiyənin ABŞ-dakı səfiri Hasan Murat Mərcan deyib.
Türkiyənin apardığı konstruktiv siyasəti ilə regionda və dünyada alternativ güc mərkəzinə çevrildiyini deyən Mərcan, indiyə qədər yaşanan hadisələrin Ankaranın haqlı olduğunu dəfələrlə sübut etdiyini vurğulayıb.
Səfir Mərcan, "Türkiyə ilə ABŞ arasındakı münasibətlər qarşılıqlı "ver-al" məntiqi ilə deyil, "strateji müttəfiqlik" prinsipləri əsasında qurulmalıdır. Əks halda, hər kəs uduzur" deyə xəbərdarlıq edib.
Nəzəriyyədə hər kəsin strateji əlaqələrdən danışdığını, lakin terror təşkilatları PKK/YPG və FETÖ və müdafiə sənayesi kimi mövzulara baxıldığında bunun “ver-al” əsaslı və “geçirən bir quruluş” olduğu görüldüyünü ifadə edən Mərcan deyib ki, bunu davam etdirmək mümkün deyil. Şəxsən o, bunu hər yerdə, hətta Konqresdə də deyib. Əlavə edib ki, bununla bağlı dəfələrlə Ağ Evdə, Pentaqonda, ölkənin digər rəsmi qurumlarında və beyin mərkəzlərində çoxlu görüşlər keçirib.
Bütün problemlərə baxmayaraq, səylər nəticəsində Türkiyə-ABŞ əlaqələrində dialoqların daha da inkişaf etdiyini vurğulayan Mərcan, "İnşallah, F-16-lar tezliklə satışa çıxarılacaq. Konqres təsdiqləyərsə, F-16-lar ilk dəfə istifadə ediləcək. Biz bunu Konqresin təsdiq prosesindən keçirmiş olacağıq. Bunlar belə böyük bir paket üçün müsbət irəliləyişlərdir" deyib.
ABŞ-ın PKK/YPG-yə baxışının münasibətlərdə çətinliklər yaratdığını və yaratmağa davam etdiyini deyən Mərcan, Ağ Evin Fətullahçı Terror Təşkilatına qarşı kifayət qədər həssaslıq nümayiş etdirmədiyini də vurğulayıb.
Diplomat Türkiyənin NATO-nun üzvü olduğunu bildirərək, “NATO-nun varlıq səbəbi üzv ölkələrin təhlükəsizliyini təmin etmək və təşkilatın üzləşdiyi təhlükəsizlik təhdidlərinə qarşı birgə hərəkət etməkdir" deyən Mərcan sözünə davam edib: "ABŞ və digər Qərb ölkələri Türkiyə ilə münasibətlərini daha uzunmüddətli və strateji perspektivə çevirməlidirlər. Əgər etməsələr, Türkiyə yoluna davam edəcək. Burada Türkiyənin müdafiə sənayesindəki inkişaflar, kəşfiyyat inkişafları, bugünkü irəliləyişlər - bunlar artıq baş verir".
Səfir Rusiyanın Ukraynaya hücumundan sonra Türkiyəyə baxışın dəyişməyə başladığını ifadə edərək, "Türkiyə orada da çox təsirli bir rol oynadı. Taxıl dəhlizi, burada görüşdüyümüz hər kəs təşəkkürünü bildirdi, təqdir etdi" deyib.
Mərkəzi Kahramanmaraş olan 6 fevral 2023-cü il zəlzələlərindən sonra başlanan yardım kampaniyalarına toxunan Mərcan deyib ki, səfirlik olaraq zəlzələ zamanı çox duyğulu anlar yaşayıblar: “İnsanların çətinlikdən çıxmaq üçün bir olduğunu görüb çox qürurlandım. Türk olduğum üçün şadam. Allah bizə bir daha belə acı yaşatmasın”.
Gələcək əsrdə Türkiyə Cümhuriyyətinin əhəmiyyətinin daha da artacağına inandığına diqqət çəkən Mərcan, "Açıq şəkildə deyə bilərəm ki, gələcək əsr Türkiyə əsri olacaq. Bu səbəblərdən Türkiyənin əhəmiyyəti çox böyükdür, mən ölkənin tarixi keçmişi, mədəni mənşəyi, baxışı, konstruktiv təbiəti və yumşaq gücü kimi qeyd etmişəm” deyə fikrini tamamlayıb.
