İndiyədək imtahan proseslərində koronavirusa heç bir yoluxma qeydə alınmayıb.
Hafta.az-ın məlumatına görə, bunu bu gün keçirdiyi mətbuat konfransında Dövlət İmtahan Mərkəzinin (DİM) Direktorlar Şurasının sədri Məleykə Abbaszadə deyib.
Onun sözlərinə görə, iyunun 1-dən başlayaraq, Dövlət İmtahan Mərkəzi imtahanlar keçirməyə başlayıb. İndiyədək 288 637 nəfərə biliyin qiymətləndirilməsi üzrə xidmət göstərilib: “Pandemiya şəraitində bütün sanitar-gigiyenik normalara riayət edilib”.
M.Abbaszadə qeyd edib ki, sentyabrın 10-da buraxılış imtahanı verməyənlər üçün buraxılış imtahanları, sentyabrın 11-də jurnalistikaya qabiliyyət imtahanı, daha sonra isə rezidenturaya qəbul imtahanı keçiriləcək. Beləliklə, imtahanda iştirak edənlərin sayı 400 minə yaxın olacaq.
