İran 15 yanvar tarixində hava məkanına məhdudiyyətlər qoyduğunu NOTAM (Təyyarəçilər üçün Bildiriş) verib. NOTAM-a görə, Tehran Uçuş Məlumat Bölgəsi (FIR) mülki uçuşlar istisna olmaqla, bütün uçuşlar üçün bağlıdır. Açıqlamada bildirilir ki, Tehran FIR daxilində uçuşlar üçün İran Mülki Aviasiya İdarəsindən əvvəlcədən uçuş icazəsi məcburidir. Məhdudiyyətin səbəbləri ilə bağlı heç bir rəsmi məlumat paylaşılmayıb.
Hafta.az yazır ki, qərar bölgədəki hava nəqliyyatının planlaşdırılmasına və tranzitinə yaxından təsir edir, aviaşirkətlərin uçuş planlarını NOTAM-a uyğun olaraq yenidən nəzərdən keçirmələri gözlənilir.
Bu arada, ABŞ Prezidenti Tramp Ağ Evdə keçirilən imza mərasimində İranla bağlı açıqlamalar verib. Tramp deyib: "Bizə İranda edamların dayandırıldığı barədə məlumat verildi. Hazırda heç bir edam planı və ya edam yoxdur. Əgər olsaydı, hamımız kədərlənərdik. Onlar edamları həyata keçirməyəcəklər".
Hərbi variantların hələ də masada olub-olmadığı soruşulduqda, Tramp deyib: "Biz prosesin necə inkişaf edəcəyini izləyəcəyik və görəcəyik".
İranın xarici işlər naziri Abbas Əraqçi Trampın İrana qarşı hərbi hücum təhdidlərinə münasibət bildirərək deyib: "Mesajım budur ki, iyunda etdiyiniz səhvi təkrarlamayın. Bilirsiniz, uğursuz bir təcrübəyə cəhd etsəniz, eyni nəticəni alırsınız. Bilirsiniz, iyunda obyektləri məhv etdiniz, amma texnologiyanı bombalamaq mümkün deyil. İran danışıqlara və diplomatiyaya hazır olduğunu sübut etdi. Müharibə ilə diplomatiya arasında diplomatiya daha yaxşı yoldur. ABŞ ilə müsbət təcrübəmiz olmasa da, diplomatiya müharibədən daha yaxşıdır".
