Məlum olub ki, Kovid-19 peyvəndi vurdurmuş ürək çatışmazlığı xəstələri peyvənd olunmayanlara nisbətən daha uzun yaşayır.
Hafta.az-ın “Earth”a istinadən yazdığına görə, əvvəlki araşdırmalarda Kovid-19-un ürək çatışmazlığı olan xəstələrdə daha pis təsirlərə səbəb olduğu və peyvəndin ürək-damar xəstəlikləri olan insanlara tətbiqinin təhlükəsiz olduğu aşkarlanıb.
Başqa bir yeni araşdırma, Kovid-19 peyvəndlərinin ürək çatışmazlığı riskini 55 faiz və infeksiyadan sonra qan laxtalanma riskini 78 faiz azaltdığını göstərib.
11-14 may tarixlərində Portuqaliyada keçirilən Avropa Kardiologiya Cəmiyyətinin 2024 Ürək Çatışmazlığı toplantısında təqdim edilən yeni araşdırmada peyvəndin bu xəstəlikdən əziyyət çəkən insanların gözlənilən ömür uzunluğuna təsiri araşdırılıb. Tədqiqatçılar Cənubi Koreyadan olan 18 və daha yuxarı yaşda 651127 nəfərin məlumatlarını araşdırıb, onlar barədə peyvənd və nəticələri haqqında məlumat almaq üçün Koreya Milli Sağlamlıq Sığorta Xidmətinin məlumat bazasından istifadə ediblər. Tədqiqata daxil olan insanların orta yaşı 69,5 il olub.
Kovid-19 peyvəndinin iki və ya daha çox dozasını alanlar peyvənd olunur. Heç vaxt peyvənd edilməmiş və ya bir doza qəbul etmişlər peyvənd olunmamış kimi müəyyən edilib. İştirakçıların 83 faizi birinci kateqoriyada olub.
Daha dəqiq nəticə əldə etmək üçün tədqiqatçılar yaş, cins, sosial-iqtisadi vəziyyət və digər xəstəliklər kimi faktorlara əsaslanaraq iştirakçıları uyğunlaşdırıblar.
6 aylıq təqib müddətinin sonunda peyvənd edilmiş ürək çatışmazlığı xəstələrinin hər hansı səbəbdən ölmə ehtimalı 82 faiz azalıb. Bundan əlavə, onların ürək çatışmazlığı səbəbindən xəstəxanaya yerləşdirilmə riski peyvənd olunmamış xəstələrə nisbətən 47 faiz aşağı olub.
Araşdırmanın müəlliflərindən olan Dr. Kionq-Hyon Çun "Ürək çatışmazlığı xəstələri sağlamlıqlarını qorumaq üçün Kovid-19-a qarşı peyvənd edilməlidir" deyib və əlavə edib: "Bu, ürək çatışmazlığı xəstələrinin böyük populyasiyasında Kovid-19 peyvəndinin effektivliyinin ilk təhlilidir".
Digər tərəfdən, Dr. Çun, tapıntıların bütün ürək çatışmazlığı xəstələri üçün etibarlı olmaya biləcəyini vurğulayır və əlavə edir: "Vəziyyəti qeyri-sabit olan xəstələrdə peyvənd riskləri nəzərə alınmalıdır".
Bundan əlavə, Cənubi Koreyada aparılan bu tədqiqatın nəticələri dünyanın digər yerlərindəki ürək xəstələrinə ekstrapolyasiya edilə bilməz. Araşdırmanın təqib müddəti də peyvəndin uzunmüddətli təsirlərinə işıq salmaq üçün kifayət deyil. Bu səbəblərə görə Kovid-19 peyvəndi almağı düşünən ürək çatışmazlığı xəstələrinin həkimlərinə müraciət etmələri faydalı olardı.
