Tanınmış aparıcı ilə taksi sürücüsü arasında dava

19:43 24.01.2023 Müəllif:Hafta.az
Yazını böyüt
Yazını kiçilt

"Qapını açanda arxadan gələn avtobus qapıya çırpıldı... Bir neçə saniyə gec gəlsə, qarşısında qapı yox, mən olacaqdım".

Hafta.az xəbər verir ki, bu sitat tanınmış teleaparıcı Vüsalə Məmmədovanın özünün sosial şəbəkə hesabında paylaşdığı statusundandır.

Aparıcının sözlərinə görə, "Bolt" sərnişindaşıma şirkətinin sürücüsü həm ehtiyatsız davranıb, həm də onu təhdid edib:

“Şirkətin qarşısında saxlamağa yer ola-ola taksi "arxadan maşın gəlir, saxlaya bilmərəm" deyib, irəli sürdü. Dayanacağa yaxın yerdə, ikinci zolaqda saxladı və "o qapı içəridən açılmır, sol qapıdan düşün" dedi... İki dəfə yoxladım, həqiqətən qapı açılmırdı, məcbur qalıb sürücünün arxasındakı qapıya tərəf keçdim. Yaşadığım stress bir yana, indi sürücü zəng edib ki, "bu işi neyləyək?". “Bolt”da qeydiyyatdan keçdiyi avtomobillə gəlməyib, qapısı xarab, sol qapıdan düşməyi deyir və saxlayanda arxadan gələn maşını görə-görə, düşəndə arxadan gələn avtobusu görmür, xəbərdarlıq eləmir... Mənə də deyir səninlə başqa yerdə danışacam”, - deyə aparıcı bildirib.

Oxunma sayı 1619