ABŞ-ın Rusiya-Ukrayna müharibəsinə son qoymaq üçün hazırladığı 28 maddəlik plan Kiyev hökumətindən çoxsaylı güzəştlər tələb edir. Layihəyə görə, Ukraynanın işğal olunmuş Donbas bölgəsini Rusiyaya verməsi gözlənilir. Həmçinin, Ukrayna ordusunun sayını 600 min nəfərlə məhdudlaşdırmağı, ölkənin NATO-ya üzv olma tələbini geri çəkməsini də nəzərdə tutur.
Hafta.az yazır ki, plan qəbul edilərsə, bu, Ukraynanın Rusiyanın bir çox tələbini yerinə yetirməsi olacaq.
Bu həftə ABŞ nümayəndə heyəti ilə görüşən Ukrayna Prezidenti Vladimir Zelenski ədalətli sülh tələb etdiklərini bildirərək deyib: "Biz müstəqilliyimizə, suverenliyimizə və Ukrayna xalqının ləyaqətinə hörmət edən şərtlər təmin edən layiqli bir sülh istəyirik".
Ukrayna lideri həmçinin noyabrın 18-də Ankaraya səfəri zamanı prezident Rəcəb Tayyib Ərdoğanla görüşdə demişdi ki, onlar təcili sülh və bunun üçün yol açacaq təhlükəsizlik zəmanətləri tələb edir, Ərdoğan isə cavab vermişdi ki, Ankara Rusiya ilə ədalətli və davamlı sülh üçün yol açacaq təklifləri müzakirə etməkdə qərarlıdır.
Bu arada, müqaviləyə son zamanlar Ukraynanı sarsıdan korrupsiya istintaqı ilə bağlı bir bənd daxildir. Qəzetə anonimlik şərti ilə danışan yüksək vəzifəli ABŞ rəsmisi bildirib ki, Kiyev administrasiyası sonradan sızdırılan layihə mətnində əhəmiyyətli bir dəyişiklik edib.
Müvafiq olaraq, layihəyə korrupsiya iddialarını ətraflı izah edən bir bənd daxil edilib: "Ukrayna aldığı bütün yardımları hərtərəfli nəzarətə götürəcək, səhvləri düzəltmək və ya müharibədən qanunsuz yolla qazanc əldə edənləri cəzalandırmaq üçün hüquqi mexanizm yaradacaq".
Xəbər verildiyi kimi, Kiyev bu bəndin "Müharibənin bütün tərəfləri müharibə zamanı etdikləri hərəkətlərə görə tam əfv alacaq və gələcəkdə heç bir tələb irəli sürməməyə razı olacaq" şəklində dəyişdirilməsini istəyir.
Rusiyanın əsasən Avropa banklarında saxlanılan 300 milyard dollarlıq dondurulmuş aktivlərinin taleyinin də müqavilə çərçivəsində müəyyən ediləcəyi gözlənilir.
ABŞ-ın rəhbərlik etdiyi plan Avropanın da tənqidlərinə səbəb olub. Fransanın xarici işlər naziri Jan-Noel Barro dünən deyib: "Sülh təslim olmaq demək deyil. Biz Ukraynanın təslim olmasını istəmirik".
Polşanın xarici işlər naziri Radoslav Sikorski də Ukrayna ordusuna heç bir məhdudiyyət qoyulmamalı olduğunu bildirib və bunun əvəzinə Rusiyanın "aqressiv potensialının" məhdudlaşdırılmasına çağırıb.
