Ermənistan və Azərbaycan arasında sülh sazişi istiqamətində irəliləyiş çox güman ki, mümkündür, lakin Azərbaycan Ermənistan üzərində təsir rıçaqlarını saxlamağa çalışdığı üçün alovlanma və ya genişmiqyaslı müharibənin yenilənməsi riski yüksək olaraq qalacaq. Bu barədə Amerikanın nüfuzlu “Stratfor” analitik mərkəzinin 2024-cü il üçün proqnozlar üzrə dərc etdiyi hesabatda deyilir.
Mərkəzin analitiklərinin fikrincə, İrəvan Bakı ilə sülh sazişi bağlamaq üçün səylərini davam etdirəcək, lakin regional tranzit dəhlizləri şərtləri ilə bağlı fikir ayrılıqları danışıqlara mane olmaqda davam edəcək.
“Ermənistan Qərblə artan siyasi əlaqələrindən və onun hərbi dəstəyindən Bakının təkidinə qarşı çıxmaq üçün istifadə edəcək, lakin İrəvanın təsir rıçaqlarının az olduğunu nəzərə alsaq, o, Bakının Ermənistanın cənubundan tranzit keçməsi və sərhədlərin delimitasiyası tələblərini qəbul edəcək”, - mənbə bildirib.
“İlin birinci yarısında mühüm irəliləyiş əldə olunmasa, genişmiqyaslı hərbi əməliyyatların başlanması üçün şəraitin əlverişli olacağı yayda Azərbaycanın Ermənistanın cənubunda əhəmiyyətli əraziləri ələ keçirməsi riski artacaq. İrəvanın Moskvadan uzaqlaşmaq istəyinə dair artan siqnallara baxmayaraq, Rusiyanın Cənubi Qafqazdakı təsiri əhəmiyyətliliyini itirməyəcək qədər azalmayacaq, çünki Ermənistan Kollektiv Təhlükəsizlik Müqaviləsi Təşkilatında qalacaq və ölkə iqtisadiyyatı Rusiya iqtisadiyyatı ilə sıx bağlı olacaq.
Eyni zamanda, Azərbaycan və Rusiya arasında ikitərəfli münasibətlər və ticarət əlaqələri yeni səviyyəyə qalxacaq. Cənubi Qafqazda Şərq-Qərb tranziti ilk növbədə Gürcüstan vasitəsilə həyata keçiriləcək, Bakı isə Rusiyanı İranla birləşdirən Şimal-Cənub infrastrukturunun inkişafına töhfə verəcək”.
