Bişkekin baş meydanında təntənəli şəraitdə daha əvvəl “Joqorku Keneş” tərəfindən qəbul edilmiş ölkənin yenilənmiş dövlət bayrağının qaldırılması mərasimi keçirilib.
Hafta.az-ın yazdığına görə, tədbirdə Qırğızıstan Nazirlər Kabinetinin sədri Akılbek Japarov, dövlət katibi Suyunbek Kasmambetov və digər dövlət rəsmiləri iştirak ediblər.
Xatırladaq ki, 2023-cü il dekabrın 20-də Qırğızıstan parlamentinin deputatları “Qırğızıstan Respublikasının dövlət rəmzləri haqqında” Qanuna dəyişiklik edilməsi haqqında” qanun layihəsini ikinci və üçüncü oxunuşda müzakirəsiz qəbul ediblər. Dekabrın 22-də Qırğızıstan prezidenti Sadır Japarov dövlət bayrağının dəyişdirilməsi haqqında qanunu imzalayıb və dekabrın 26-dan qüvvəyə minib.
2024-cü il yanvarın 1-də səhər saatlarında ölkənin yeni və fərqli dizaynlı dövlət bayrağı qaldırılıb və bu, sosial şəbəkələrdə istifadəçilər arasında aktiv müzakirələrə səbəb olub. Hətta bir çoxları bu barədə mənfi fikirlər də səsləndirdilər.
