Qəzza atəşkəsindən sonra yaradılmasına razılıq verilən "Sülh Qüvvəsi" hələ də yaradılmayıb.
Hafta.az-ın yazdığına görə, məsələ ilə bağlı “Middle East Eye”yə (MEE) məlumat verən iki mənbə bildirib ki, ABŞ Türkiyənin iştirakı ilə bağlı İsraillə fikir ayrılıqları səbəbindən BMT Təhlükəsizlik Şurası tərəfindən nəzərdə tutulan Qəzza üçün beynəlxalq sabitlik qüvvəsinin yaradılmasında çətinlik çəkir.
Təhlükəsizlik Şurası ötən ay Türkiyə, Qətər, Misir, BƏƏ, Səudiyyə Ərəbistanı, İndoneziya, Pakistan və İordaniyanın rəsmi dəstəyi ilə bu qüvvənin yaradılması üçün qətnamə qəbul edib. Lakin mənbələr o vaxtdan bəri az irəliləyiş əldə edildiyini qeyd ediblər. Türkiyə rəsmiləri dəfələrlə Ankaranın qüvvəyə töhfə verməyə hazır olduğunu bildiriblər, lakin İsrail Qəzza zolağında Türkiyə hərbi varlığını istəmir.
İsrailin müxalifətinə baxmayaraq, Türkiyənin Qəzzaya ən azı 2000 əsgərdən ibarət qoşun yeritmək üçün hazırlıqları başa çatdırdığı bildirilir. Məlumata görə, bu qüvvələr əvvəllər sülhməramlı və münaqişələrlə mübarizə təcrübəsi olan əsgərlərdən ibarətdir. Danışıqlarla tanış olan bir mənbə MEE-yə bildirib ki, "Səudiyyə Ərəbistanı, Azərbaycan, Pakistan və İndoneziya kimi ölkələr Türkiyənin iştirakı olmadan qoşun göndərmək istəmirlər". Bu arada, BƏƏ aydın çərçivənin olmamasını əsas gətirərək "hələlik" qüvvələrdə iştirak etməyəcəyini açıqlayıb.
Məsələ ilə tanış olan ikinci bir mənbə MEE-yə bildirib ki, Ankara hələ də ABŞ-ın İsrailin baş naziri Benyamin Netanyahunu Türkiyənin iştirakını qəbul etməyə razı salmasını gözləyir. Mənbə bildirib ki, "Vaşinqton Türkiyə qoşunlarının yerləşdirilməsində israr edir".
ABŞ planı ilə tanış olan bir mənbə həmçinin "Washington Post"a bildirib ki, Qəzzada planlaşdırılan sülhməramlı qüvvələrə 15 minlə 20 min arasında əsgər daxil ediləcək.
