ABŞ administrasiyası 2026-cı il FİFA Dünya Kubokunda Argentina milli komandasının nümayiş etdirdiyi və üzərində "Folklend Adaları Argentinanındır" yazısı olan pankartı müdafiə edib.
Hafta.az yazır ki, prezident Donald Trampın Dünya Kuboku üzrə müşaviri Endryu Culiani dünən mübahisəli pankartı ifadə azadlığının həyata keçirilməsi hesab edilməli olduğunu bildirib. O, ölkədə ifadə azadlığının Konstitusiya ilə qorunduğunu və argentinalı oyunçuların bu cür açıqlamalar verməsində heç bir problem görmədiyini xatırladıb.
15 iyulda oynanılan yarımfinal matçında Argentina İngiltərəni 2-1 hesabı ilə məğlub edib. Dünya Kubokunun finalına yüksələn komanda meydanda "Folklend Adaları Argentinanındır" yazısı olan pankartı nümayiş etdirərək qələbəsini qeyd edib.
Argentinanın "Las Malvinas" adlandırdığı adalara iddiasını dəstəkləyənlər də "Folklend Adaları" əvəzinə bu ifadədən istifadə edirlər.
Digər tərəfdən, FİFA meydanda siyasi bayraqların, şüarların və simvolların nümayiş etdirilməsinə icazə vermir.
Pankart London hökumətinin sərt tənqidinə səbəb olub. Böyük Britaniya Baş naziri ofisinin 16 iyul tarixli açıqlamasında hadisə ilə bağlı araşdırma aparılmasına çağırış edilib və bildirilib: "Dünya Kuboku bizim olmaya bilər, amma Folklend adaları mütləq bizimdir".
Tramp tərəfindən dəstəklənən Argentina lideri Xavyer Milie cümə axşamı günü verdiyi açıqlamada adalar üzərində "hər gün suverenliyi ələ keçirməyə yaxınlaşdıqlarını" iddia edib.
Argentina 2014-cü ildə Sloveniya ilə Dünya Kubokunun hazırlıq matçından əvvəl oxşar bir pankart nümayiş etdirmişdi. Bunun ardınca FİFA Argentina Futbol Federasiyasını 30 min İsveçrə frankı cərimələmişdi.
Argentina 19 iyulda final matçında İspaniya ilə qarşılaşacaq.
1982-ci ildə Argentina və Birləşmiş Krallıq arasında baş verən Folklend müharibəsi 649 Argentina və 255 Britaniya əsgərinin, eləcə də 3 ada sakininin ölümünə səbəb olub.
