Səudiyyə Ərəbistanı informasiya nazirinin müavini Dr. Məcid əl-Kəsabi peşəkar və effektiv ərəb media platforması yaratmaq üçün birgə səylərə çağırıb.
Hafta.az-ın yazdığına görə, Kasabi dünən paytaxt Ər-Riyadda "Formalaşan dünyada Media" şüarı altında keçirilən 22-ci Ərəb Radio və Televiziya Festivalının açılışındakı çıxışında "Ərəb dünyasının mesajını çatdırmağa kömək edən çevik, effektiv və səmərəli media sənayesinin vaxtı gəldi" deyib.
Ərəb istedadlarını dəstəkləmək, yaradıcılıq və novatorları təşviq etmək, media sahəsini, qabaqcıl vasitələri və texnologiyaları inkişaf etdirmək üçün Səudiyyə Ərəbistanı təşəbbüsünün başladığını elan edən Kasabi festivalın uğurlu olmasını, ərəb xalqlarının və liderlərinin istəklərinə cavab verən nəticələr verməsini arzulayıb.
"40 ildən çoxdur davam edən festivalın tarixi yaradıcıları qeyd etmək, istedadları inkişaf etdirmək və ərəb media sənayesini dəstəkləmək üçün dəyərli fürsətdir", - deyib Kasabi.
Mindən çox ekspert və media mütəxəssisinin iştirakı ilə başlayan üç günlük sammitdə ərəb regionunda medianın reallığı və gələcəyi müzakirə olunacaq. 40 ildən sonra ilk dəfə Tunisdən kənarda keçirilən festival media sənayesi ilə bağlı bir sıra mövzuları əhatə edir.
Festivalın qonaqları Səudiyyə Ərəbistanında kinematoqrafiyanın gələcəyi, rəqəmsal ərəb məzmununun həqiqiliyini nəzərdən keçirmək və mənalı məzmun yaratmaq, qadınların media sahəsində iştirakı və onların kinoda rolu ilə bağlı sessiyalarda iştirak edəcəklər.
Festivalın sonu bu sahənin inkişafına və regionun media xəritəsi üçün aydın xüsusiyyətlərin cızılmasına yönəlmiş bir çox təşəbbüslərin və tərəfdaşlıqların başlanmasının şahidi olacaq.
Festivalda dünyanın hər yerindən 500 media mütəxəssisi və 300 prodüser şirkəti ilə yanaşı 5 mindən çox nümayəndənin iştirakı gözlənilir.
Açılış mərasimində bir qrup media və kino sənayesi qabaqcılları ərəb dünyasında media məzmununun zənginləşdirilməsinə töhfələrinə görə mükafata layiq görülüblər.
Festival çərçivəsində 10-12 noyabr tarixlərində qlobal istehsal sahəsində bir sıra aparıcı şirkətlərin və geniş çeşidli beynəlxalq təşkilatların iştirakı ilə Medianın Gələcəyi Sərgisi (FOMEX) keçiriləcək.
