Qüdsün qədim hissəsində yerləşən erməni məhəlləsinin dörddə birinin İsrailə icarəyə verilməsi məsələsi Erməni Pravoslav Kilsəsinin Patriarxı Nurhan Manukyanın Erməni Monastırında gizlənməsinə, kilsənin daşınmaz əmlak müdirinin isə Kaliforniyaya sığınmasına səbəb olub.
Hafta.az-ın İndependent Arabia-ya istinadən yazdığına görə, Erməni Patriarxı ilə İsrail-Avstraliyalı iş adamı Denni Rotman arasında imzalanan müqaviləyə əsasən, Denni Rotmana Sion dağının yuxarısındakı məhəllənin təxminən 25 faizində torpaq və daşınmaz əmlakın inkişafı hüququ verilir.
İş təxminən üç il əvvələ gedib çıxsa da, bir neçə həftə əvvəl Patrik Manukyanın icarə müqaviləsini ləğv etmək cəhdlərinin hamısı uğursuzluqla nəticələnəndə, ictimaiyyətə açıqlanıb.
Patriarxın icarəni ləğv etməkdən boyun qaçırması Fələstin və İordaniyanın patriarxı "tanımasını" dayandırmasına səbəb olub.
İki ölkənin birgə mövqeyində onların yaydığı bəyanatda deyilir ki, “Manukyanın hərəkətləri qanunun və kilsənin tələb etdiyi kimi, maraqlı tərəflərin konsensusu və Mar Yakup qardaşlığının ümumi assambleyasının məsləhətləşmələri olmadan baş verib”.
Sözügedən torpaqlar və daşınmaz əmlaklar Qüdsün qədim hissəsinin qapılarından biri olan Nəbi Davud qapısından Xəlil qapısına qədər uzanır.
Erməni məhəlləsi BMT-nin Təhsil, Elm və Mədəniyyət Təşkilatı (UNESCO) tərəfindən Təhlükədə olan Ümumdünya İrsi siyahısına daxil edilmiş Qüdsün qədim rayonunun bir hissəsidir.
Patriarx Manukyan günahı Patriarxlığın daşınmaz əmlak üzrə məsul işçisi Baret Yeretsyanın üzərinə atsa da, rəsmi onun “uzunmüddətli danışıqlarda tam iştirak edən və müqaviləni özü imzalayan” Manukyanın göstərişlərinə uyğun hərəkət etdiyini vurğulayıb. Erməni patriarx Yeretsyanın "kilsədən qovulduğunu, icarəni başa çatdırmaq üçün aldadıldığını" vurğulayaraq, bunun onun xəbəri olmadan baş verdiyini bildirib.
Qüdsdəki Erməni Patriarxlığının 12 keşişi erməni məhəlləsində torpaqların icarəyə verilməsini pisləyərək, kilsənin nizamnaməsinin uzunmüddətli icarə müqavilələri imzalayaraq torpaqların monopoliyaya alınmasını qadağan etdiyinə diqqət çəkib. Yüzlərlə erməni patriarxın bağladığı monastırı mühasirəyə alaraq “satqın” qışqıraraq icarə müqaviləsinin təfərrüatlarının açıqlanmasını və ləğvini tələb ediblər.
İsrail əsilli avstraliyalı iş adamı Denni Rotmanın erməni məhəlləsindəki torpaq sahəsini icarəyə götürməsi ilə bağlı müzakirələrə gəlincə, Yeretsyan bunun “yalnız Rothmanın yəhudi kimliyinə əsaslanan təbliğat olduğunu” deyib. O, həmçinin "Rothmanın heç vaxt buranı yəhudiləşdirmək istəımədiyini" və "heç bir siyasi planının olmadığını" vurğulayıb.
Lakin ermənilərin hücumundan sonra sığındığı Kaliforniyada olarkən Yeretsyan icarə haqqında təfərrüatları açıqlamaqdan imtina edib və deyib ki, bu barədə ancaq yüz illik icarə başa çatandan sonra danışmaq olar.
Həmin məhəllədə 2 minə yaxın erməni yaşayır və İsrail onlara İsrail vətəndaşlığı deyil, daimi yaşayış yeri verməklə Şərqi Qüdsdə fələstinli kimi davranır.
