COVİD-19 pandemiyasına qarşı ölkə başçısının və eləcə də Nazirlər Kabinetinin hər bir tapşırıq və sərəncamına aidiyyəti qurumlar tərəfindən sözsüz əməl ediməlidir. İlk oncə yerlərdə vaxtlı-vaxtında dezinfeksiya işləri aparılmalıdır. Təəssüflər olsun ki, paytaxtın Xətai rayonu, Neapol küçəsində yerləşən 24, 26a və 28 saylı yaşayış binalarında, nədənsə, dezinfeksiya işləri aparılmır.
Sakinlərdən Elman Bayramov bildirdi ki, 26 a saylı binada yaşayır. Onun sözlərinə görə, COVİD-19 pandemiyası dünyanı çənginə alıb. Paytaxtda əhali arasında geniş yayılmağa başlayıb. Karantin rejimi tətbiq edilib, amma yaşadıqları binada nədənsə dezinfeksiya işləri aparılmır. Yaşadığımız binanın girəcəklərində, zirzəmisində və eləcə də sakinlərin sıx toplaşdığı ərazilərdə dezinfeksiya işləri aparılmayıb: “Karantin rejiminə qədər hər gün sakinlər çıxıb həyətdə oturur, uşaqlar isə oynayırdılar. Həyətdəki oturcaqları, söhbətgahları, uşaq oyuncaqlarını gəlib dezinfeksiya etmirlər. Aidiyyəti qurumlar mərkəzi küçələri dezinfeksiya edir. Hər gün bloklarla onlarca insan mərtəbələrə çıxıb-düşür, nədənsə gəlib girəcəkləri, binaların mərtəbələrini, pilləkənləri, liftləri dezinfeksiya etmirlər. Yeri gəlmişkən deyim ki, elə xəstəliyin yayılma riskinin də artmasının bir səbəbi yaşayış binalarında və zibil qutuları qoyulan ərazilərdə dezinfeksiya işlərinin aparılmamasıdır”.
Xətai Rayon Mənzil Kommunal Təsərrüfatı Birliyi şöbəsinin müdiri Ramiz Əliyev “Həftə içi”nə 26a saylı binanın Rayon MKTB-nin tabeliyində olmadığını bildirdi. Birliyin sözçüsü vurğuladı ki, sözügedən bina (yenitikili) təzə tikilib. Binanın özünün komendantı var: “Komendat tərəfindən həmin binanın lifti gündə 2-3 dəfə, girəcəklər və mərtəbələrində isə hər gün dezinfeksiya işləri aparılmalıdır. Bu haqda 26a saylı binanın komendantı Mahir müəllimə məlumat veriləcək”.
