Səudiyyə Ərəbistanı Ərəb (Fars) körfəzindəki Durra qaz yatağının bölüşdürülməsinə dair Küveytlə razılaşdırılmış prosesin irəliləyəcəyini bir daha bəyan edib. İran Xarici İşlər Nazirliyinin sözçüsü isə ölkəsinin Küveytə Durra qaz yatağı məsələsini texniki və hüquqi dialoq yolu ilə həll etməyə hazır olduğunu çatdırdığını bildirib.
Hafta.az-ın yazdığına görə, jurnalistlərə açıqlama verən “Saudi Aramco” şirkətinin prezidenti Əmin bin Həsən əl-Nasser bildirib: “Durra yatağı küveytlilərlə planlaşdırıldığı kimi irəliləyir. Bu məqamda mühəndislik və inkişaf baxımından heç bir problem yoxdur”.
Ərəb Dünyası Xəbər Agentliyinin (ANA) İran mediasına istinadən verdiyi məlumata görə, İran Xarici İşlər Nazirliyinin sözçüsü Nasir Kənani deyib ki, Tehran Küveyti Durra qaz yatağı faylını texniki və hüquqi dialoq yolu ilə həll etməyə hazır olduğunu bildirib. “Biz İran xalqının hüquqlarını vurğuladıq. Danışıqlar çərçivəsində Küveyt tərəfi ilə görüşməyə hazır olduğumuzu bildirdik”, - o deyib.
Küveyt baş nazirinin müavini və neft naziri Saad əl-Barrak ANA-ya bildirib ki, “İranın Durra yatağı ilə bağlı iddiaları bu sahədəki faktları əsassız hesab etmir. Bu reallıq yatağın Küveyt və Səudiyyə Ərəbistanının birgə mülkiyyətində olduğunu təsdiqləyir”.
Barrak əvvəlki açıqlamalarında “Küveyt Durra yatağında kəşfiyyat və hasilat işlərinə başlayacaq və bu prosesə İranla sərhəd məsələsini həll etməyi gözləmədən start verəcək” deyə bildirmişdi.
Səudiyyə Ərəbistanı Xarici İşlər Nazirliyi də bu yaxınlarda elan edib ki, Ər-Riyad və Küveyt bölünmüş bölgədəki təbii sərvətlərə, o cümlədən bütün Durra yatağına sahib olduqlarını təsdiqləyiblər. Nazirlik əlavə edib ki, Səudiyyə Ərəbistanı və Küveyt bu bölgədəki sərvətləri istismar etmək üçün tam suveren hüquqlara malik olduqlarını bildiriblər.
Küveyt Durra qaz yatağının ümumi hüquqlarını təmin etmək məqsədilə beynəlxalq müqavilələrin bağlanması üçün danışıqlar da daxil olmaqla istənilən addımı atmağa hazır olduğunu bəyan edib.
Ötən həftə İranın Körfəzdə bölünmüş bölgənin şərq sərhədinin demarkasiyası ilə bağlı danışıqlara çağırışlarını təkrarlayaraq, iki ölkə İranla danışıqlara hazır olduqlarını bildiriblər.
