Əfqanıstanın paytaxtı Kabildə qadınlar üçün xüsusi bazar açılıb.
Hafta.az-ın “TOLO News”a istinadən yazdığına görə, məqsəd son iki il ərzində işsiz qalan 100-dən çox qadın sahibkar üçün məşğulluq imkanları yaratmaqdır.
Bazarın təsisçisi Racmana Xaliqinin sözlərinə görə, onun məqsədi hazırkı vəziyyətdə Əfqanıstanda yaşayan qadınlar üçün daha rahat mühit yaratmaq olub. Ailəsinin çörəkpulu qazanmaq üçün yeganə gəlir yeri olan bazar satıcısı Olya Əhmədyar 18 ildən artıqdır ki, bizneslə məşğul olduğunu və məhsullarını mağazada arxayınlıqla sata bildiyini deyir.
"Biz belə bir bazar açmağa şadıq, çünki əvvəllər mallarımızı satmağa yer yox idi. Sifarişlər alırıq, satışlarımız da var", - o deyib.
Bazardakı iş qadınları onlar üçün belə təhlükəsiz məkan yaratdıqlarına görə minnətdarlıqlarını bildiriblər və İslam Əmirliyindən iş qadınlarına dəstək vermələrini xahiş ediblər.
İş qadını Şükriyyə Əhmədyar deyir: “Bu, xüsusilə qadınlar üçün çox yaxşıdır, çünki burada həm satıcılar, həm də alıcılar qadınlardır, yəni qadınlar qadınlara xidmət edir”.
“İslam Əmirliyindən məhsullarımızı satmaqda bizə dəstək verməsini xahiş edirəm", - Feroza adlı başqa bir sahibkar qadın deyib.
Bu bazara əşyalar almaq üçün gələn bəzi qadınlar İslam Əmirliyindən onlara işləmək imkanı verməsini xahiş ediblər.
"Biz İslam Əmirliyindən qadınların ayaq üstə dura bilmələri üçün işləməyə icazə verməsini xahiş edirik. Çünki ailədə kişiləri olmayan qadınlar var ki, onları təmin etsinlər, ona görə də qadınlar işləməlidir", - restoran sahibi Mina deyib.
Rəsmilər bazarda restoran, çayxana və qadınlar tərəfindən idarə olunan 30-dan çox mağazanın olduğunu bildiriblər. Hər gün qadınlar alış-veriş üçün bura gəlirlər.
Bazar təxminən 20 hektar ərazini əhatə edir və obyektin tikintisi 50 milyon əfqaniyə başa gəlib.
