Əlcəzairin Oran şəhərində 25 iyun-5 iyul tarixlərində keçiriləcək 19-cu Aralıq dənizi oyunlarına hazırlıq çərçivəsində, Əlcəzair Güləş komandasının nümayəndə heyəti 9-21 iyun tarixləri arasında Bakıda təlim-məşq toplantısı keçirib.
Hafta.az-ın yazdığına görə, idmançılar və texniki heyət Azərbaycanın səlahiyyətli orqanları tərəfindən onlar üçün yaradılan şərait və məşqdən razılıq ifadə ediblər. Səfirlik, məşqin idman məqsədlərinə nail olunmasına şərait yaradan və görülən səylər üçün Azərbaycan Respublikasının Gənclər və İdman nazirinə, həmçinin Azərbaycan Güləş Federasiyasının Prezidentinə təşəkkürünü bildirir.
Bu dinamika iki ölkə arasında idman sahəsində, xüsusən də, Azərbaycanın çoxlu sayda çempion yetişdirdiyi döyüş idman növlərində əməkdaşlığa təkan verəcək.
Əlcəzairli güləşçilər iyulun sonunda İslam Oyunlarına və digər beynəlxalq tədbirlərə hazırlaşmaq üçün yenidən Bakıya gələcəklər.
