Həftəsonu Mərakeş son illərdə hökumətə qarşı ən böyük etiraz aksiyalarının şahidi oldu. Ən azı 11 şəhərdə insanlar korrupsiyaya etiraz etmək üçün küçələrə çıxıb.
Hafta.az-ın yazdığına görə, nümayişçilər Rabat hökumətinin beynəlxalq idman təşkilatlarına vəsait ayırarkən səhiyyə və təhsilə laqeyd yanaşdığını iddia edirlər.
“Budur stadionlar, bəs xəstəxanalar hanı?” kimi şüarlar İspaniya və Portuqaliya ilə birlikdə 2030-cu ildə keçiriləcək futbol üzrə dünya çempionatına ev sahibliyi etməyə hazırlaşan ölkədə səslənib.
Ən azı üç stadionun tikildiyi və altı meydançanın təmir olunduğu ölkə yaxın aylarda Afrika Millətlər Kubokuna da ev sahibliyi edəcək.
Etirazlarda təxminən 3 min adamın ölümünə səbəb olan 2023 zəlzələsinin davam edən yaraları və Aqadirdəki dövlət xəstəxanasında doğuş zamanı səkkiz qadının ölməsi kimi məsələlər də diqqətə çatdırılıb.
Mərakeş İnsan Haqları Dərnəyi şənbə günü saxlanılan onlarla insandan bəzilərinin fiziki zorakılığa məruz qaldığını bildirib. Assosiasiya həmçinin təhlükəsizlik qüvvələrinin nümayişləri yatırdığını və ifadə azadlığını məhdudlaşdırdığını bəyan edib.
Həmkarlar ittifaqları və siyasi partiyalar tərəfindən təşkil edilən etirazlar əvvəllər böyük diqqət çəksə də, bu dəfə TikTok və Diskord kimi sosial media platformaları vasitəsilə təşkilatlanan gənclər liderlik edib.
“Z 212 nəsli” və “Mərakeş gənclərinin səsi” kimi təşkilatlar “dinc, sivil etiraz”a və “məsuliyyətli müzakirələrə” çağırıblar.
Kasablankadakı etirazlara qatılan 27 yaşlı mühəndis Yusef, “Heç bir ümid yoxdur. Mən təkcə səhiyyə və təhsildə deyil, bütün sistemdə islahat istəyirəm. Daha yaxşı maaşlar, daha layiqli iş yerləri, aşağı qiymətlər və daha yaxşı həyat tələb edirəm” deyib.
1995-2010-cu illər arasında doğulmuş insanlar Mərakeşdə cəmiyyətin ən böyük seqmentini təşkil edir. Etirazçılar həmçinin Nepalda Z nəslinin hökuməti devirən hərəkətlərindən ilhamlandığını bildiriblər.
-1780681336.jpg&h=173&w=263&zc=1&q=80)
