Venesuela Qızıl Xaç Cəmiyyətinin prezidenti Mario Enrike Villarroel işçilərə qarşı təzyiq və pis rəftar iddialarından sonra vəzifəsindən azad edilib.
Hafta.az-ın AFP-yə istinadən yazdığına görə, Ali Məhkəmə dünən 75 yaşlı Villarroelin işdən çıxarıldığını açıqlayıb. Açıqlamada ölkədəki Qırmızı Xaç İdarə Heyətinin üzvlərinin də işdən çıxarıldığı bildirilib.
Villarroelin yerinə Venesuelanın ən böyük həmkarlar ittifaqı olan “Fedecamaras”ın keçmiş rəhbəri Rikardo Kuzanno təyin edilib.
Ali Məhkəmə qurumun köklü şəkildə yenidən qurulmasını tələb etsə də, Venesuela Qızıl Xaç Cəmiyyətinin hazırkı işinin prosesdən təsirlənməyəcəyini bildirib.
Məhkəmənin ifadəsində Villarroelin müəssisədə "bəzi insanlarla pis rəftar etdiyi və onlara sataşdığı" iddia olunub. İttihamlarla bağlı təfərrüatlar açıqlanmasa da, keçmiş menecerin barəsində məhkəmə prosesinin başlandığı bildirilib.
Fransa xəbər agentliyi AFP, Villarroelin vəzifədən uzaqlaşdırılmasında hakim Venesuela Birləşmiş Sosialist Partiyasının vitse-prezidenti Diosdado Kabellonun açıqlamalarının da təsirli olduğuna diqqət çəkib. O, Venesuela Qızıl Xaç Cəmiyyətinin keçmiş prezidentini ölkə lideri Nikolas Maduroya qarşı sui-qəsddə və “onu mafiyaya bənzər şəkildə idarə etməkdə” ittihamlayıb. Xəbərdə ABŞ-ın 2020-ci ildə narkotik alveri ilə bağlı Kabelloya qarşı məhkəmə iddiası açdığı və başına 10 milyon dollar mükafat qoyduğu da xatırladılıb.
Qırmızı Xaç Təşkilatı isə Ali Məhkəmənin qərarını tənqid edərək, Maduronu prosesi dayandırmağa çağırıb. Venesuela lideri hələlik hadisə ilə bağlı açıqlama verməyib.
Venesuelanın aparıcı insan haqları təşkilatı "Provea"dan Rafael Uzcategui isə məhkəmənin qərarının birləşmək azadlığını pozduğunu və "təhlükəli presedent yaratdığını" bildirib.
