Ukrayna Parlamentinin İnsan Hüquqları üzrə Komissarı (Ombudsman) Dmitri Lubinets Rusiyanın müvəqqəti işğalı altında olan ərazilərdən 2358 ukraynalı uşağın ölkəyə qaytarıldığını açıqlayıb.
Hafta.az yazır ki, Lubinets Telegram hesabında verdiyi açıqlamada bildirib ki, "2358 uşaq işğal olunmuş ərazilərdən evə qayıdıb. Hər bir uşağı geri qaytarmaq üçün mübarizəmiz davam edir".
Lubinets bildirib ki, Rusiya 2014-cü ildən bəri ukraynalı uşaqları qaçırır və zorla Rusiya ərazisinə aparır. O, bu təcrübənin beynəlxalq hüquqa görə cinayət və soyqırım təşkil etdiyini vurğulayaraq, uşaqların geri qaytarılması prosesinin çox vaxt ailələrin və ya qohumların müraciətləri ilə başladığını qeyd edib.
Lubinets həmçinin uşaqların ailələri ilə yenidən birləşmələri üçün şəxsən danışıqlar apardığını və Ombudsman Aparatının bu proses üzərində beynəlxalq tərəfdaşlarla gündəlik işlədiyini bildirib: "Beynəlxalq tərəfdaşlarımızla birlikdə hər bir uşağı evə qaytarmaq üçün yorulmadan çalışırıq".
Ukrayna hakimiyyəti tərəfindən verilən məlumata görə, rəsmi Rusiya sənədlərində 744 min ukraynalı uşağın işğal olunmuş Ukrayna ərazilərindən Rusiyaya aparıldığı qeyd olunur. Ukrayna hökuməti bildirir ki, bu uşaqların taleyi beynəlxalq mexanizmlər vasitəsilə izlənilir.
