ABŞ-ın Ukraynaya hərbi yardımı və kəşfiyyat məlumatlarını paylaşmasını dayandırması müharibənin gedişatını dəyişə bilər.
Hafta.az-ın “The New York Times”a istinadən yazdığına görə, ABŞ prezidenti Donald Trampın Ukrayna ilə döyüş sursatı və kəşfiyyat məlumatlarını paylaşmağı dayandırmaq qərarı müharibəyə son qoya bilər və ya Rusiyaya əhəmiyyətli üstünlüklər verə bilər.
Analitiklər, Ukraynanın Avropanın silah və kəşfiyyat dəstəyi sayəsində ABŞ-ın yardımı olmadan yay boyu müharibəni davam etdirə biləcəyini proqnozlaşdırırlar. Lakin onlar bu vəziyyətin Rusiyanın Ukraynanın müdafiə xətlərinə hücumunu asanlaşdıracağına da diqqət çəkirlər.
Kimliklərinin açıqlanmaması şərti ilə danışan Tramp administrasiyasının rəsmiləri, Ukrayna lideri Vladimir Zelenskinin Ağ Evin tələblərini yerinə yetirməyə razılıq verəcəyi təqdirdə ABŞ yardımının yenidən aktivləşdiriləcəyini bildirib.
Ukrayna əsilli keçmiş ABŞ ordusu zabiti, 2019-cu ildə Milli Təhlükəsizlik Şurasında xidmət edən Aleksandr Vindman aşağıdakı şərhləri bölüşür: “Bu vəziyyət ilk növbədə əsgərlərin mənəviyyatına təsir edəcək. Bu, rusları gücləndirərkən ukraynalıları ruhdan salacaq”.
Mənbələr bildirirlər ki, Tramp dəstəyi kəsərək Zelenskini mədən sazişini imzalamağa məcbur etmək istəyib. Rəsmilər deyirlər ki, Zelenski razılaşmanı qəbul edərsə, ABŞ-ın keçmiş prezidenti Co Bayden dövründə təsdiqlənmiş yardımın tədarükünə icazə veriləcək. Tramp administrasiyasının yeni yardımı təsdiq edib-etməyəcəyi isə bəlli deyil.
Vaşinqtonda yerləşən Karnegi Beynəlxalq Sülh Fondundan Dara Massikot iddia edir ki, Rusiya may ayında yeni hücumlara başlaya bilər.
Tramp və Zelenski fevralın 28-də Ağ Evdə görüşüblər və görüşdə iki lider arasında qızğın müzakirələr olub. Bu səbəbdən Vaşinqtonla Kiyev arasında nadir torpaq elementləri üzrə mədən sazişi imzalana bilmədi. Çətin görüşdən sonra ABŞ Ukraynaya bütün hərbi dəstəyin dayandırıldığını bəyan edib.
Digər tərəfdən, Rusiya prezidenti Vladimir Putin nadir torpaq elementləri sahəsində ABŞ ilə birgə işləməyə hazır olduqlarını bildirib.
“Reuters”in təhlili göstərir ki, Trampın təzyiqi nəticə vermiş ola bilər. Çərşənbə axşamı verdiyi açıqlamada Respublikaçı lider Zelenskinin ona danışıqlar masasına qayıtmaq istədiyini bildirən məktub göndərdiyini bildirib.
