Əfqanıstan Xarici İşlər Nazirliyi BMT-nin Əfqanıstanda cavab cəzasının tətbiqi ilə bağlı bəyanatına reaksiya verib.
Hafta.az-ın yazdığına görə, BMT-nin Əfqanıstandakı nümayəndəliyindən verilən açıqlamada bu ölkədə qətl törədən insanlara verilən edam cəzası tənqid edilib, edamın ləğvi tələb olunub.
Əfqanıstan Xarici İşlər Nazirliyindən verilən açıqlamada BMT-nin vəzifə səlahiyyətlərinə aid olmayan məsələlərlə bağlı açıqlamalar verdiyi bildirilib. Bəyanatda BMT-yə “həddinizi aşmayın” sözləri ilə reaksiya verilib.
Bəyanatda əlavə edilib: "Əfqanıstan İslam Əmirliyi məhkəmə qərarlarını birinci instansiya, apellyasiya və Ali Məhkəmənin üçtərəfli məhkəmə sistemi vasitəsilə hərtərəfli araşdıran məhkəmə prosesinə uyğun olaraq icra edir və burada hər bir iş ciddi hüquqi yoxlamaya məruz qalır. Bu proses boyu müttəhimə işin başlanğıcından yekun qərar qəbul edilənədək tam müdafiə hüquqları verilir”.
Əmirliyin bəyanatında qeyd olunub ki, şəriətin təyin etdiyi cəzaların, o cümlədən qisasın tətbiqi İslam hüququnun danılmaz tərkib hissəsidir. “Müqəddəs Yazılarda qisas almaq həyatın qorunması ilə açıq şəkildə əlaqələndirilir, insan təcrübəsi də ədalətin və ictimai asayişin qorunmasında qisas almanın effektivliyini nümayiş etdirib. İslam hökuməti olaraq Əfqanıstan İslam Əmirliyi qisasın həyata keçirilməsini dini öhdəlik hesab edir”, - bəyanatda qeyd olunub.
Sonda İslam Əmirliyinin Xarici İşlər Nazirliyi UNAMA-ya xatırladıb ki, İslam şəriətinin müddəalarını tənqid etmək və ya zəiflətmək cəhdləri həddindən artıqdır. Bunlar təşkilatın mandatına birbaşa ziddir və qəti şəkildə qəbuledilməzdir. UNAMA-nın gələcəkdə bu cür bəyanatlar verməkdən çəkinməsi vacibdir.
