Türk dünyasının önəmli ölkələrindən biri olan Qazaxıstanın Kiprin yunan tərəfi ilə bağlı verdiyi son qərar Türkiyə ictimaiyyətində reaksiyalara səbəb olub.
Hafta.az-ın yazdığına görə, Qazaxıstanın Kiprdəki (Yunan Kipri) yeni səfiri Nikolay Cumakanov etimadnaməni prezident Nikos Xristodulidesə təqdim edib. Etibarnamənin qəbulu ilə bağlı məsləhətləşmələr aparan səfir Cumakanov, "Astana Kipr Respublikasının beynəlxalq səviyyədə tanınmış əraziləri daxilində suverenliyini və ərazi bütövlüyünü qətiyyətlə dəstəkləyir" deyib.
Kiprlə (Yunan Kipri) köklü dostluq münasibətlərinin olduğunu bildirən Cumakanov bildirib ki, Kipr qlobal təhlükəsizlik və əməkdaşlığın əsası olan beynəlxalq hüquq, suverenlik və ərazi bütövlüyü prinsiplərinə riayət etmək əzmini təkrarlayır.
“Qazaxıstan beynəlxalq arenada Kipr Respublikasının öz sərhədləri daxilində suverenliyini və ərazi bütövlüyünü qətiyyətlə dəstəkləyir. Biz hesab edirik ki, bütün mübahisələr beynəlxalq hüquq normalarına uyğun olaraq sülh yolu ilə dialoq və diplomatik vasitələrlə həll olunmalıdır. Biz Kipri regionda sülh, sabitlik və əməkdaşlığı təşviq etmək üçün göstərdiyi davamlı səylərə görə təbrik edirik. Biz Qazaxıstan olaraq Kiprlə dostluğa böyük əhəmiyyət verir, ölkənizi Avropa İttifaqında və daha geniş Aralıq dənizi regionunda mühüm tərəfdaş hesab edirik”, - qazax diplomat bildirib.
Yunan Kiprinin prezidenti Kristodulides də gözlənildiyi kimi, Qazaxıstanın Cənubi Kiprdə səfirlik açmasını çıxış yolu kimi qiymətləndirərək, “Türkiyə 50 ildir Kiprdə işğalçı ölkədir” iddiasını səsləndirib. O, Qazaxıstana “Kiprin müstəqilliyi, suverenliyi və ərazi bütövlüyünə göstərdiyi sarsılmaz dəstəyə görə” minnətdarlığını bildirib və qeyd edib ki, ən münasib vaxtda Astanaya səfər edəcək. O eyni zamanda, Qazaxıstan prezidentini Nikosiyaya səfərə dəvət edib.
